يتم التشغيل بواسطة Blogger.
RSS

دماغي بترغي







أحيانا ببئا عايز اكتب , او ديما
بحس اني مش مركز في اي حاجه بعملها , وبحس دماغي كإنها هتنفجر وعايزه تتكلم
وانا اتعودت لما يحصلي كده , مبهداش غير وانا ماسك القلم والورقه وبكتب
حتي الكتابه ع الكيبورد , مش بتمزجني , بحس ان الكلام اللي ينزل من خيالي علي الكيبور علي طول " ملوش طعم " حتي لو كان كلام كويس .

الحل هي الكتابه التقليديه , مع ان دي المشكله !
المشكله اني مبحتفظش بالأقلام والورق في مكان محدد , لاني مبستخدمهومش في اي حاجه تانيه .
لذلك لو كتبت مره , تاني مره بتعب جدا علي ما ألاقي القلم وورقه فاضيه تاني .
المشكله التانيه , اني بغلط كتير وبمسح اللي كتبته او بقطع الورق لما بلاقي ان مش ده الموضوع اللي عايز اكتبه , وده في معظم الاحيان بيسببلي مشاكل كتير لان عدد الورق عندي قليل جدا .
المشكله التالته : ودي بئا ميزه وعيب في نفس الوقت , وهي اني بقعد باصص للورق ييجي ربع ساعه مش عارف اكتب ايه اصلا , هو كده عايز اكتب وخلاص .

وفجـأه , ألاقيني مسكت القلم ونزلت كتابه كتابه رغم اني معرفش السطر الجاي هيكون ايه ؟ زي منا بعمل دلوقت بالظبط !
وبـعد ما اوصل لكمية كلمات زي اللي كتبتهم دول بسيب القلم .... وأرجع اقرأ هو انا كتبت ايه ؟
عشان تييجي المرحله الاكثر حيره في الموضوع وهي ايجاد نهايه مناسبه وهدف للموضوع .

ثم أمسك القلم تاني وأكتب ...!
وفي الوقت ده بيبئا عندي مشكلتيين ؟
اولهم : اني اتضايقت لاني مش فاهم حاجه مـ ن خطي اللي كتبت بيه .
تاني حاجه : اني مكسل أنقل الكلام ع اللاب توب عشان انشره .


بلاحظ السيجاره في ايدي ....!
بمناسبة السجاير , انا بذكر السجاير كتير في كتاباتي لانها للاسف جزء من حياتي , وأنا اللي بعمله بالكتابه اني بنقل حياتي لمجموعة كلمات مترابطه , وكل ما اتعقد الموضوع واتشتت الفكره ببئا نجحت في الوصف جدا .

استني استني
تقدر تقولي استفدت ايه من اللي قريته ده ؟
انا عن نفسي ما استفدتش حاجه !
وعشان كده حاسس اني استريحت , وطلعت اللي جوايا دلوقت .
أقوم بئا أكمل حياتي ع الكيبورد و أرمي القلم علي أمل اني ألاقيه المره الجايه لما أحب أكتب .

سلامو عليكووو


  • Digg
  • Del.icio.us
  • StumbleUpon
  • Reddit
  • RSS
Read User's Comments0

انا مقاطع






انا يمكن اكون مغلوب علي امري ومطلوب مني اختار
بين واحد جاب الحطب , والتاني قاد النار
انا يمكن اكون مش فاهم حاجه , ومطلوب مني أفكر
يا أهدم بيتي بإيديا , يا أسيبه ينهار
انا يمكن اكون زيك , لكن لسه انت بتكابر
وبين حيطين لبسنا ياعم , وبرضو لسه بتعافر
ياعم النور أهوه باين وأسهلك متحبطنيش , يا نـهار

أبوك اختار يزق يمين , وانت اخترت تمشي شمال
ولسه الحل برضو زي ما كان , الـميدان
بتتريق ؟ براحتك عادي , هنفضل برضو لسه رجال
بنبكي الدم , مش بنبيعه ثم في وقت نحتاجه فـ نبكي يا سندان

في قطر الثوره انا شابط
ولا هطبل ولا هماطل
بلاه الشغل انا عاطل
بلاه الحلم لو هختار ما بين ساقط وبين ساقط
انا مقاطع


  • Digg
  • Del.icio.us
  • StumbleUpon
  • Reddit
  • RSS
Read User's Comments0

للاسف الثوره نجحت



للاسف الثوره نجحت في نتائج الجوله الاولي ولكننا نكابر .
تييجو نـشوف مـع بعض .. ؟

هبدأ ببلدي , اللي صحيت اول امبارح بليل علي خضه ان شفيق نجح , وعرفت انه اخد من اللجنه بتاعتي 2000 صـوت .
وابو الفتوح 700 و حمدين 700 – اما مرسي والاخوان اللي كانوا قاعدين بكثره قدام اللجان فـ خد 300 صوت أهم ينفعو برضو .
أصوات الثوره في لجنتي 1400 صـوت ومبحسبش لا الاخوان ولا الفلول .
عارفين يعني ايـه 1400 واحد ينتخبو ابو الفتوح وحمدين .. ؟
احنا من سنه بس كنت بفرح لما اشوف حد في الشارع بيحب الثوره , مكنتش بسمع في الشارع غير شتيمه وسب دين للي جاب الثوره , كون ان 1400 يطلعو لممثلي الثوره فـ ده شئ كويس . الرقم بيقول ان احنا اتطورنا كتير عن اللي كنا عليه .

اما بئا عن محافظة الدقهليه ككل – فـ شفيق المركز الاول بـ 420 ألف صوت .
رقم يخض , بـس لما تشوف حمدين واخد 395 ألف , وابو الفتوح واخد 248 ألف يبئا احنا نجحنا .

حتي المنوفيه اللي ادت لشفيق 600 ألف بفارق حوالي 400 ألف عن التاني , لو جمعنا اصوات حمدين و ابو الفتوح هنلاقيهم 250 ألف – وده رقم مش قليل في محافظه مشمتش ريحة الثوره , ومتربيين طول عمرهم علي ان يكون ليهم رئيس ديكتاتور ويا حبذا لو كان منهم .

وهنلاقي المحافظات الثوريـه " اسكندريه , السويس , بورسعيد  الخ الخ " كلهم مع حمدين اصوات ثوريـه .

مـن غير كلام كتير نبص ع النهائي
مرسي 5 مليون ونص مثلا
شفيق 5 مليون ونص تقريبا
حمدين 4 مليون ونص تقريبا
ابو الفتوح 4 مليون وشويه

مرسي محسوب للاسف علي الثوره فـ لو حسبنا كل الاصوات اللي صوتت لصالح المحسوبين علي الثوره هنلاقيهم حوالي 14 مليون – والفلول 5 مليون
ده نجاح عظيم للثوره , بمقارنه بالاعداد اللي كانت في التحرير بـ حزب الكنبه .
للاسف احنا نجحنا بس مكنش في تنسيق صح .
وعايز اقول , محدش يقولي انتخب مرسي في الاعاده عشان الثوره , لانه لو مكنش نزل عشان الطمع بتاعهم كان زمان حمدين و ابو الفتوح بيعيدو رسمي .
ولكن برضو مش انا اللي احط صبعي في دم الشهداء عشان انتخب شفيق .
للاسف الثوره أصبحت مؤجله – الاخوان لازم يقدموا قرابيين من " دستور و حكومه " للشعب عشان شفيق ميستغلش نقطة الحكم الاسلام في تجييش الناس خلفه وللاسف ده هيحصل .
الاخوان معدش ليهم بعد ربنا غير القوي السياسيه .. والثوره معدش ليها غير ربنا .


  • Digg
  • Del.icio.us
  • StumbleUpon
  • Reddit
  • RSS
Read User's Comments0

رغي



لما تلاقيني بكلمك بإحترام وجاد جداً اعرف اني بمثل يا عليك , يا علي نفسي .
لما تلاقي كلامي معظمه ضحك وتريقه وصوت القاعده موصل لاخر الشارع اعرف ان انا موجود بكل عقلي .
والواقـع بيقول : ان انا بمثل كتير .. !
وبما اني مبحبش حاجه اسمها واقع , فـ عادي يقول اللي يقوله مفيش بينا كلام .

لما بـحس ان المثاليه دخلت حياتي بجري في ثانيه وأعمل اي حاجه تافهه جداً عشان اطردها .
زي .. ؟
اقولك زي ايـه .

اني مثلاً أبعت رساله لـ أسامه منير وهو يقرأها فأنزل حلقه عباره عن ساعتين عشان أقطع منها 10 ثواني اللي فيهم اسمي ورسالتي واحتفظ بيها وأبعتها لاصحابي , ليه معرفش .
او اني اصحي " من سنه الكلام ده " الصبح بدري قبل الساعه 6 الصبح عشان أسمع بدري من يومك مع احمد يونس – وادخل علي صفحة البرنامج ع الفيس بوك واعمل زي العيال الموجودين اقعد اكتب اسمي كتير عشان يقرأه .
وتبئا موجوده كومنتات زي مثلا مممممممممم :

-         البعد نار : اقرا اسمي يا احمد والنبي .
" مع ان اسمه مش موجود – ولا ابوه سماه البعد وابوه اسمه نار ؟ "

او
-         انا اصلا مجنونه : انا همشي يا جماعه , شكرا يا احمد انك مقرتش اسمي .
" علي اساس انه هيزعل عشانها ويسيب البرنامج ويطلع يجري وراها يراضيها ههههه تخيل يمسك المايك " يا مجنونه ارجعي يا مجنونه هههههههههههه
حد يعمل عقله بعقل عيال مجانين برضو .. ؟

هو الكلام كله من الراديـو أي نعم وده لاني لما بهرب من الواقعيه طبيعي بتجنب التلفزيون وبروح للراديو وبالذات نجوم اف ام .
مش عارف ليه , بس يمكن عشان ليا ذكريات حلوه معاها , او وحشه مش عارف والله بس المهم انها ذكريات واكيد احسن من الواقع .. !
ايام ما كنت بسمع الاغاني وأكتب كلماتها بسرعه في ورقه عشان احفظها , او بعد فتره اني أسجل الاغاني علي اي شريط موجود في البيت بغض النظر ان كان مهم او مش مهم .. !
تقريبا الاغاني اللي بحبها واللي عايشه في ذهني هي اغاني ما قبل 2008 لان مكنش في وسيله تانيه اسمعها غير ع الاف ام وكانت كل فين وفين , مش زي دلوقت تنزل الالبوم تسمعه مرتين تلاته وتزهق منه متسمعوش تاني خاااااالص .

طب بمناسبة الاغاني , ايه رائيك اهديك اغنيه انا واثق انها مش هتعجبك خالص .. بس صدقني جامده فحت .







اغنيه هبله صح .. ؟
نزلها بئا واحتفظ بيها , ولما تحس ان المثاليه والواقعيه خنقوك اسمعها , هتحس نفس الاحساس اللي انت حاسه دلوقت وانت بتقرأ التدوينه دي .

سلام بئا عشان السيجاره خلصت , وانا وقت تدويني محدد بإنتهاء السيجاره J








  • Digg
  • Del.icio.us
  • StumbleUpon
  • Reddit
  • RSS
Read User's Comments0

النهايـــ لاء ــــــــه






صدفه .. !
يمكن , بس هي في الاخر حقيقه .

بنت حبته زمــااان وكانت طايره من الفرح بيـه .. استكتر نفسه عليها وجرحها رغم انه عارف انها بتحبه بجد .
بعد سنتين حب بـنت وكان طاير من الفرح بيها .. استكترت نفسها عليه وجرحته رغم انها عارفه انه بيحبها بجد .

" المفارقه "
البنتين من نفس البلد – كذبو نفس الكذبه – حسهم نفس الاحساس .


بـعد كام سنه .. !

بنت حبته جدا بحركة جنون , كلمته في يوم , خرجت معاه تاني يوم , وكانت طايره من الفرح بيـه بس استكتر نفسه عليها رغم انه عارف انها بتحبه بجد
بعدها بشهور , جرب يحب بنت بحركة جنون , وكان فرحان بيها , ومحصلش نصيب .

" المفارقه "
حبته جدا ومحبهاش – والتانيه لا هو حبها ولا هي حبته
بس المهم ان كل مره من المرات الاربعه دول كانت موجوده وبقوه الـ " لاء "

الخلاصه : انه مقدرش ينسي حبه الوحيد مع اللي حبه .. وفشل انه ينساها برضو لما حاول يحب غيرها .
الذكريات دايما بتصرخ في وشه في النهايــــــــــــــــ لاء ــــــــــــــــــــــــــــــــــــــــــــه .


  • Digg
  • Del.icio.us
  • StumbleUpon
  • Reddit
  • RSS
Read User's Comments0

قولت لاء يوم جمعة التطهير




من سنه وشويه وكنا يوم خميس – سهران طول الليل مستني امي تصحي عشان اقولها ع اللي ناوي اعمله بكره .. !
كنت قاعد ع السطح كعادتي بعد الفجر , لقيتها طالعه تلم الغسيل , وكان الجو مليل لسه والنور بيهجم ع الليل والجو مثالي اني أطالبها بالحاجه دي .. !
ادخلها منين ؟ ادخلها ازاي ؟ مممممممم
توكلت علي الله واتكلم : ماما انا مش هصلي الجمعه النهارده هنا
قالت : اومال فين .. ؟
قولت : ان شاء الله هصليها مع اخواتي في ميدان التحرير
برقتلي وقالت : نعم .. ! إيـاك تخرج إياك
اتنرفزت : هو انا عيل صغير , انا هروح يعني هروح
اتنرفزت : عايز تروح عشان تجيلي ميت وعنيها دمعت
قولت : يعني هما اللي ماتوا احسن مني .. ؟ وبعدين النهارده جمعة التطهير عشان مبارك يتسجن وحق الشباب اللي ماتو ميروحش هدر
قالت : برضو لاء

نزلت متعكنن علي امي وقرفان ومش طايق نفسي , كده مش معايا فلوس ومش هعرف اروح وكمان مبعرفش ازعلها .. !
اتصل بيا محمود صحبي الساعه 8 : ها هنروح ؟
قولت : امي مش راضيه ومش معايا فلوس
قال : معايا انا , تعالي وملكش دعوه
قولت : امي هتزعل , وانا مبعرفش ارتاح في حته لو هي زعلانه
قال : سايسها شويه وتعالي
قولت : لاء

قرأن الجمعه بدء وانا قاعد قرفان , انا هموت وانزل التحرير بجد زهقت من القاعده ومناصرة الثوره من البيت – ناس كتير منزلتش الثوره بسبب الفلوس .
وناس اكتر منزلتش عشان متزعلش أهلها وتموت وهما غضبانين عليهم .. !
قولت لاء .
نزلت كلمتها تاني : ماما انا رايح مع رحله للجامعه يعني مع اصحابي
قالت : قولت لاء
قولت : عموما انا ماشي , انا كنت جاي اعرفك بس

وطلعت لبست ولقيتها طلعالي : برضو هتمشي , وربنا يا عبدالرحمن هيبئا اخر كلام بينا لو خرجت
ضحكتلها ومشيت وهي قاعده بتعيط .. !
روحت خدت محمود وسافرنا القاهره وطول الطريق قاعد اقوله : تعالي نرجع انا قلبي متقطع عشان سايب امي زعلانه مني
يقول : ياعم خلاص خرجنا وكام ساعه ونرجع
اقول : انا حاسس فعلا اني هموت النهارده , انا مش خايف من الموت بس امي هتموت فيها لو موت
قال : انت اهبل مفيش ضرب في الثوار خلاص دلوقت
قولت : مش من الرصاص ممكن نموت في حادثه
قال : لاء متخافش

روحنا وقضينا اربع ساعات من امتع لحظات حياتي , نسيت امي واللي جابو امي وانا في الميدان , كنت فخور ان انا مصري , مكنتش مصدق ان انا مشارك في مليونيه للثوره في التحرير .. !
الساعه 5 بالظبط قولت لمحمود يلا نروح عشان انا مش مستطعم اليوم وامي غضبانه عليا .
واحنا ماشيين وقفنا عند الجامعه الامريكيه لقيت ابويا بيتصل , وابويا بيتكلم في التليفون بصوت عالي فـ مش بسمعه ولا هو بيسمعني , افتكرته بيزعق معايا , ارتبكت اكتر واترعبت مش منه .. !
احساس غريب كده , اللي جرب اللي انا عملته ده بس هو اللي هيعرف انا بقصد ايه .

طول الطريق واحنا راجعين , محمود زعلان اننا مشينا بدري , وانا قلقان ومتوتر معرفش ليه , بس كنت حاسس احساس روعه اني قولت لاء بس كنت مقهور ان الـ لاء دي كانت لـ امي .
روحنا البيت لقيت امي عادي جدا , وحمدالله ع السلامه وكانت مبسوطه بيا علي عكس ما سيبتها الصبح , وابويا قولتله انت كنت بتزعقلي في التليفون .. ؟
قالي لاء : انا كنت بقولك جبت فلوس منين , وقضي يومك وتعالي براحتك .. !
ندمت اني قولت " لاء " لمحمود لما قالي خلينا قاعدين لبليل واهو يوم وهيعدي .
استخدمت الـ " لاء " في اليوم ده مرتين , مره فرحت بيها رغم اني زعلت اني قولتها .
ومره زعلت بيها رغم اني كنت فرحان وانا بقولها .. !

بـعد كده مبقتش بقولها اني نازل مظاهرات عشان متزعلش , وكمان عشان الفلوس بئا قررت احضر كل المظاهرات اللي حصلت في كل الاحداث اللي بعد الثوره بس في المنصوره بـحجة اني في الجامعه .


  • Digg
  • Del.icio.us
  • StumbleUpon
  • Reddit
  • RSS
Read User's Comments0

قول لاء







في يوم قررت اتكلم
قولت لاء – وكانت اول مره اقولها
حسيت ساعتها احساس غريب .. !
كلمات كتير لازم فعلا أتعلمها
زهقت من قولة حاضر , نعم  وماشي
حسيت قد ايه انا كنت ماشي مع المواشي
مش لازم راحتك تبئا زي غيرك , عادي .. !
ممكن غيرك من اول ضربه يبيع ضميره – وانت ترفض تسلم .. !
فـ انطق بئا واتكلم

مش من حقك السكوت
استخدم حقك فـ الصوت
ارفض – وافق – عارض , ارغي اتكلم
صدقني بكره تندم ع السكوت
فيها ايه لو كنت قولت – لاء – مدام متألم
فـ انطق بئا واتكلم

  • Digg
  • Del.icio.us
  • StumbleUpon
  • Reddit
  • RSS
Read User's Comments0